കൃഷ്ണ കവിതകളിലെ വരികൾ

മലയാളത്തിൽ കൃഷ്ണനെക്കുറിച്ച് ഏറെ പാടിയിട്ടുള്ള കവയിത്രിയാണ് സുഗതകുമാരി. സുഗതകുമാരി ടീച്ചറിന്റെ കൃഷ്ണ കവിതകളിൽ നിന്നുള്ള ഏതാനും വരികൾ

കണ്ണുമടച്ചു കിനാക്കളിൽ മാത്രം

കണ്ണാ, നിന്നെക്കണ്ടു ഞാൻ

ഈ വിരഹത്തിൻ നോവിൽ, ചെന്തീ

യാളുകയാണെന്നുള്ളത്തിൽ

വന്നാലും നീ വന്നാലും, മണി

വർണ്ണാ കേണു വിളിപ്പൂ ഞാൻ

നിന്നെത്തേടി നടന്നിട്ടയ്യോ

ജന്മശതങ്ങൾ കഴിഞ്ഞല്ലോ

- കണ്ണനെത്തേടി

ചുടുകണ്ണീരൊടു പാർഷതിയൊന്നു

വിളിക്കെയുഴറ്റൊടണഞ്ഞോനേ, നീ

യെവിടെ? വിളിച്ചു വിളിച്ചു തളർന്നേ

നെവിടെപ്പോയ് നീയെന്നുടയോനേ?

- ഗജേന്ദ്രമോക്ഷം

കനിഞ്ഞു പുഞ്ചിരി ചിന്നിക്കൊണ്ടെൻ

കണ്ണാ, നർത്തനമാടൂ നീ

കതിരൊളി മിന്നിക്കളരവമിളിതം

ലളിതം നർത്തനമാടൂ നീ

- കാളിയമർദ്ദനം

അറിയില്ലയെന്നെ നീ

യെങ്കിലും കൃഷ്ണ നിൻ

രഥമെന്റെ കുടിലിന്നു മുന്നിൽ

ഒരു മാത്ര നിൽക്കുന്നു!

കണ്ണീർ നിറഞ്ഞൊരാ

മിഴികളെൻ നേർക്കു ചായുന്നു!

- കൃഷ്ണ നീയെന്നെ അറിയില്ല